Хоразмда амалдор турар жой қуриш рухсатномасини олиш учун пул ундирмоқчи бўлди
Тошкент. 15 июн. ЎзТАГ – Миллий хавфсизлик хизматининг Хоразм вилояти бўйича ходимлари Урганч тумани ҳокимиятининг саноат, капитал қурилиш, коммуникациялар ва коммунал хўжаликни ривожлантириш бўйича бош мутахассиси Рашид Тангриевни ашёвий далил билан бирга қўлга олдилар, деб хабар беради Ўзбек телеграф агентлиги (ЎзТАГ) куч тизими хабарига асосланган ҳолда.
“У маҳаллий фуқародан Урганч тумани ҳудудида 43 намунали уйлар қуриш учун зарур тегишли рухсатномаларни расмийлаштириш ва бериш жараёнини тезлаштириш эвазига 100 миллион сўм ундирмоқчи бўлди”, - деб таъкидланади МХХ хабарида.
Вилоят прокуратураси қўлга олинган шахсга нисбатан Ўзбекистон Жиноят кодексининг тегишли моддалари бўйича иш қўзғади. Ҳозирда Р.Тангриевнинг бошқа ноқонуний ҳаракатларини аниқлаш бўйича ишлар олиб борилмоқда.
