Хусусий Uzreport TV телеканали илк марта йирик футбол тадбирларини тўғридан-тўғри кўрсатиш ҳуқуқини сотиб олди

Тошкент. 9 сентябр. ЎзТАГ – Ўзбекистон тарихида илк марта хусусий Uzreport TV телеканали энг йирик уч футбол тадбирларини тўғридан-тўғри кўрсатиш ҳуқуқини сотиб олди. Бу ҳақида куни кеча эълон қилинган матбуот анжуманида маълум қилинди, деб хабар беради Ўзбек телеграф агентлиги (ЎзТАГ).

Олдин хабар қилингани каби, 15 сентябрдан бошлаб Uzreport TVда УЕФА Чемпионлар лигаси ўйинларини тўғридан-тўғри кўрсатиш бошланади. Телеканал юқоридаги ҳуқуқларни 2015-2016 йиллардан 2017-2018 йилларгача уч мавсум учун сотиб олди ва Ўзбекистонда ана шу каби трансляцияларнинг расмий вакили бўлди. 29 ўйинни намойиш қилиш режалаштирилмоқда.

Бундан ташқари, томошабинлар энг яхши ўйинларнинг такрорларини ҳам кўрадилар. Трансляциялар бошида комментаторлар русча ишлайдилар, кейин уларга ўзбек тилли шарҳловчилар қўшиладилар.

Бундан ташқари, канал Англия Премьер-лигаси (АПЛ) ўйинларини ҳам трансляция қилиш ҳуқуқларини қўлга киритди. Натижада ўзбек ишқибозлари “Челси”, “Ливерпуль”, “Манчестер Юнайтед”, “Арсенал” каби жамоалар ўйинларини томоша қилиш имкониятига эга бўладилар.

АПЛ футбол ўйинларини ноябрдан бошлаб трансляция қилиш режалаштирилмоқда.

Шунингдек, Uzreport TV футбол бўйича EURO-2016 чемпионатини кўрсатиш бўйича ҳам эксклюзив ҳуқуқларга эга. Бу биринчилик Францияда 2016 йил 10 июндан 10 июлгача бўлиб ўтади.

Матубуот анжуманида УЕФА – TEAM Marketing (Швейцария) Европа клуб футболи Эксклюзив тижорат агенти, Saran Media International (Мальта) компанияси, трансляция ҳомийси EVO компанияси вакиллари қтнашдилар.

Uzreport TVнинг бош директори Равшан Жўраев жорий йилда телеканал янги концепциясини тасдиқлагани, унга кўра, соғлом турмуш тарзини тарғиб қилувчи спорт контентини ривожлантириш устивор йўналишлардан бирилигини таъкидлади.