Кичик бизнеснинг Ўзбекистон ЯИМ улуши 57%гача ўсди

Тошкент. 3 май. ЎзТАГ – Кичик бизнеснинг Ўзбекистон ялпи ички маҳсулотидаги (ЯИМ) улуши 2000 йилдаги 31%дан 2016 йилга келиб 57%гача ўсди, соҳада бандлар улуши эса навбати билан 49,7%дан 78,1%гача кўпайди, деб хабар беради Ўзбек телеграф агентлиги (ЎзТАГ).

Ушбу маълумотлар 2 май куни Савдо саноат палатасида БМТТД “Ўзбекистон Бизнес-форуми (III босқич)” лойиҳаси томонидан ташкил этилиб, ишбилармонлик муҳитини яхшилаш ва Ўзбекистоннинг Жаҳон банки “Бизнес юритиш” ҳисоботидаги халқаро рейтингини ошириш масаласига бағишланган давра суҳбатида келтирилди.

Тадбирда таъкидланишича, “Doing Business – 2017” рейтингида Ўзбекистон 189 мамлакат орасида 87 ўринни олди ҳамда минтақада баъзи кўрсаткичлар бўйича етакчи бўлди. Жумладан, мамлакат “Мулкни рўйхатдан ўтказиш” ва “Миноритар инвесторларни муҳофаза қилиш” кўрсаткичларини навбати билан 2016 йилдагига нисбатан 6 ва 8 поғонага яхшилади.