КХЛ Тошкент клубининг лигага кириш ҳақидаги аризасини у келиб тушгач кўриб чиқади
Тошкент. 13 октябр. ЎзТАГ - Континентал хоккей лигаси (КХЛ) директорлар кенгаши аъзоси, Лиганинг биринчи президенти Александр Медведев “Р-Спорт”га берган интервюсида КХЛ Тошкент клубининг лигага кириш ҳақидаги аризасини у келиб тушгач кўриб чиқишини маълум қилди, деб хабар беради Ўзбек телеграф агентлиги (ЎзТАГ) россия ОАВга асосланган ҳолда.
“Россия ва Ўзбекистон ўртасидаги сиёсий ва иқтисодий муносабатлар жуда яхши ривожланмоқда. Бундан ташқари, Тошкент клуби совет даврида ҳам ўйнаган. Жуда яхши спорт саройи қурилмоқда. Муз бўлган жойда жуда кўплаб болалар хоккей билан шуғулланади. Бу собиқ СССР ҳудудида яхши салоҳиятга эга. Келинг, улар ўз мажбурият ва режаларини қандай бажаришларини кўрайлик. КХЛ аризани у етиб келгандан сўнг кўриб чиқади”, - деди Александр Медведев телефон орқали.
“Бу нафақат КХЛ жамоаси, балки Ўзбекистонда хоккейни ривожлантириш режаси ҳамдир”, - деб қўшимча қилди у.
Эслатиб ўтамизки, кеча 12 октябрда Тошкентнинг “Бинокор” клуби 2020 йилгача Континентал хоккей лигаси иштирок этиш учун талабнома топшириш ниятидалигини маълум қилган, Россия Хоккей федерацияси бошқаруви аъзоси Александр Стеблин эса Ўзбекистонда хоккей анъаналарида борлиги ҳақида айтиб ўтган эди.
