Клубнинг ёшлар таркиби билан мамлакат чемпиони бўлган мутахассис “Пахтакор”нинг бош тренери вазифасини бажарувчи қилиб тайинланди
Тошкент. 8 июл. ЎзТАГ – Клубнинг ёшлар таркиби билан мамлакат чемпиони бўлган Нуъмон Ҳасанов “Пахтакор”нинг бош тренери вазифасини бажарувчи қилиб тайинланди, деб хабар беради Ўзбек телеграф агентлиги (ЎзТАГ) пойтахт жамоаси сайтига асосланган ҳолда.
Ўзбекистон Футбол федерацияси (ЎФФ) маълумотларига кўра, Ҳасанов бундан олдинроқ футбол бўйича Ўзбекистон термасига бош мураббий қилиб тайинланган Самвел Бабаян ўрнига келди.
Эслатиб ўтамизки, 45 ёшли Н. Ҳасанов футболдаги карьерасини “Автомобилист” жамоасида бошлаган. Кейинчалик у “Соҳибкор”, “Пахтакор”, “МХСК”, “Рубин” (Россия), “Дўстлик”, “Насаф”, “Кўқон-1912”, “Трактор”, “Шўртан”, “Сўғдиёна”ва “Локомотив” клубларида ўйнаган. Юқоридаги жамоалар таркибида тўрт марта мамлакат чемпионатини ютиб олган ва икки карра Ўзбекистон Кубогини эгаллаган. Терма жамоа таркибида 23 ўйин ўтказиб, 4 гол урган.
Футбол ўйнашни тўхтатганидан кейин у мураббийлик билан шуғулланган. 2012 йилда Ҳасанов биринчи лига жамоасини бошқарган ва “Пахтакор” ёшлар жамоасига бош мураббийлик қилган ҳамда уни олтин медалларга олиб келган. 2013 йилда Самвел Бабаяннинг тренерлик штабида ўрин эгаллаб, жамоанинг 2014 йилда Ўзбекистон чемпионати олтин медалларини олишига ҳисса қўшган.
