KOICA ТАТУда талабаларни ўқитишнинг замонавий технологияларини жорий қилади
Тошкент. 2 март. ЎзТАГ – Корейс халқаро ҳамкорлик агентлиги (KOICA) ва Тошкент ахборот технологиялари университети (ТАТУ) замонавий ўқитиш технологияларини жорий қилиш орқали ҳамкорликни фаоллаштиришни режалаштирмоқдалар, деб хабар беради Ўзбек телеграф агентлиги (ЎзТАГ).
Томонлар таълимда замонавий технологияларни жорий қилиш бўйича ТАТУ ва KOICA ўртасидаги лойиҳанинг дастлабки ҳаракатланиш режасини тезкорлик билан ишлаб чиқилишини келишиб олдилар. Бу келишувга Ахборот технологиялари ва коммуникацияларини ривожлантириш вазирлигида Корея Халқаро ҳамкорлик бўйича агентлиги делегацияси билан учрашувда эришилди. Корея делегацияси агентликнинг Ўзбекистондаги бўлинмаси раҳбари Им Жонг Хи бошчилик қилди.
KOICA миссияси Тошкентга Тошкент ахборот технологиялари университетида ахборот-коммуникация технологияларини жорий қилиш орқали инновациялашган таълимий муҳитни ривожлантиришга оид лойиҳа бўйича бирламчи тадқиқотларни олиб бориш учун ташриф буюрган.
Учрашувда ахборот технологиялари соҳаси учун кадрлар тайёрлаш бўйича ҳамкорлик, жумладан Тошкент ахборот технологиялари университетида масофавий таълим ва электрон кутубхона тизимларини татбиқ қилиш истиқболлари муҳокама қилинди.
Қайд этилганидек, ТАТУ ҳамда KOICA ўртасидаги ҳамкорликнинг ривожланиши Ўзбекистонда халқаро талабларга мос мутахассислар тайёрлашдаги навбатдаги муҳим қадам бўлади.
