Кореянинг KOICA агентлиги “Ўзстандарт” ривожини қўллаб-қувватлайди
Тошкент. 29 июл. ЎзТАГ – Корея халқаро ҳамкорлик агентлиги (KOICA) мутахассислари “Ўзстандарт” агентлигига беш кунлик ишчи ташрифини амалга оширдилар, деб хабар беради Ўзбек телеграф агентлиги (ЎзТАГ).
Ташриф “Замонавий ахборот-коммуникация технологияларини татбиқ этиш ва Бош ривожлантириш режасини ишлаб чиқиш йўли билан “Ўзстандарт” агентлиги имкониятларини ошириш” лойиҳаси доирасида амалга оширилди.
“Ўзстандарт” агентлигидан маълум қилишларича, лойиҳа KOICA гранти ҳисобига молиялаштирилмоқда.
Мутахассислар ҳамкорлигида олиб борилган ишлар натижасида “Ўзстандарт” агентлиги тармоқ инфраструктураси тизимини қуришда мухим хисобланган тармоқ ва сервер ускуналари рўйхати келишиб олинди.
Шунингдек, ташриф давомида лойиҳанинг асосий йўналишлари аниқлаб олинди ва умумий лойиҳа амалга оширилиши юзасидан концептуал қарорлар қабул қилинди. Ташриф сўнгида тегишли баённома имзоланди.
