Корейс консорциуми “Тошкент” аэропортида янги терминал қуриш лойиҳаси асосномасини ишлашга киришди

Тошкент. 26 январ. ЎзТАГ – Корейс компаниялари консорциуми “Тошкент” аэропортида янги халқаро йўловчи терминали қуриш лойиҳасининг техник-иқтисодий асосномасини ишлаб чиқишга киришди, деб хабар беради Ўзбек телеграф агентлиги (ЎзТАГ).

“Яқинда Тошкентда ўзбек ва корейс томонининг ишланма доирасидаги илк учрашуви бўлиб ўтди. Ўтган йили Корея халқаро ҳамкорлик агентлиги (KOICA) лойиҳани амалга ошириш учун “Инчен” аэропорти консорциумини танлаган эди. У жорий йилнинг январидан июнига қадар лойиҳа ҳамда аэропортни бошқариш режасини амалга ошириш бўйича техник-иқтисодий ҳужжатларни тайёрлаши зарур”, – деб таъкидлашди KOICA матбуот хизматида.

Илк мажлисдаги тақдимотида “Инчен” аэропорти бошқарувчи менежери Ким Донг Чёл ишлар режаси ҳақида гапириб берди ва Корея томони энг яхши натижаларга эришиш учун қўлидан келганча ҳаракат қилиши, бор тажрибасидан фойдаланишини айтиб ўтди.

Бошланғич маълумотларга кўра, янги терминал қурилишининг қиймати $300 млндан ошиши мумкин.