Корейс ошхонаси бўйича Тошкентлик энг яхши ошпаз Сеулга стажировкага боради
Тошкент. 3 июл. ЎзТАГ – Корейс ошхонаси бўйича Тошкентлик энг яхши ошпаз Сеулга стажировкага боради, деб хабар беради Ўзбек телеграф агентлиги (ЎзТАГ).
Маълумотга мувофиқ, конкурс 22 июлда Тошкентда бўлиб ўтади. Унинг ташкилотчиси Корея Республикасининг Ўзбекистондаги элчихонасидир.
Элчихонадан хабар беришларича, конкурс бир неча йилдан бери Тошкент Меҳмонхона хўжалиги ва сервис касб-ҳунар коллежида ўтказилиб келинади. Унда 10 моҳир ошпазлар қатнашади. Улар кореядан келтирилган турли қайта ишланган қишлоқ хўжалик маҳсулотларидан фойдаланадилар. Ғолиб Кореяда бўлиб ўтадиган Корейс таомлари-2015 конкурси финалида қатнашади.
Шунингдек, ғолибга Сеул шаҳри билан танишиш ва Корейс пазандалик институтида стажировкадан ўтиш имконияти берилади.
Бундан ташқари, Тошкентдаги конкурс доирасида “Коре” ансамблининг чиқиши, ушбу танловда фойдаланилган маҳсулотлардан тайёрланган корейс таомларини татиб кўриш маросими ҳам бўлиб ўтади.
Эслатиб ўтамизки, конкурс Корея ва Ўзбекистон ўртасидаги маданий алмашинувларни кенгайтиришга қаратилган. Шунингдек, бу ерда Ўзбекистонга Кореядан импорт қилиш мумкин бўлган истиқболли маҳсулотлар билан танишиш мумкин.
