Корейс театри Тошкентда “Макбет”ни намойиш қилди

Тошкент. 8 октябр. ЎзТАГ – 7 ва 8 октябрда Тошкентдаги Ўзбекистон Ёшлар театри саҳнасида “Haeboma” жанубий корейс театри Шекспирнинг “Макбет” пьесаси асосидаги спектакльни намойиш қилди, деб хабар беради Ўзбек телеграф агентлиги (ЎзТАГ) мухбири.

“Pound it, Makbet” спектакли пойтахтда Korea Foundation (KF) ва Корея Республикасининг Ўзбекистондаги элчихонаси кўмагида тақдим этилди. Янги мавсумни очар экан Ёшлар театри бадиий раҳбари Наби Абдураҳмонов ташкилотчилар, жумладан, Корея Республикасининг Ўзбекистондаги элчиси Ли Ук Хенга миннатдорчилик билдирди.

Ушбу ташриф “Haeboma”нинг Ўзбекистонга иккинчи келиши ва лойиҳа ўтган йили муваффақиятли ташрифдан келиб чиқиб молиялаштирилди. Шекспирнинг классик драмасига ўзига хос ёндашув эса таниқли асарга ўзига хос талқин бағишлади.

Бундан ташқари, “Pound it, Makbet”да корейс санъатининг анъанавий воситаларидан бўлган барабанлардан усталик билан фойдаланилган. Улар ёрдамида томошадаги саҳналар ўзига хослик касб этган.

Спектакльда Макбет ролини актёр Шин Хан Ву (Shin Han Wool) моҳирлик билан ижро этган.