“Кристалл” супермаркетида чиққан ёнғиндан кейин Тошкентнинг барча СКМда текширувлар кетмоқда

Тошкент. 17 июл. ЎзТАГ – “Кристалл” супермаркетида чиққан ёнғиндан кейин Тошкентнинг барча савдо-кўнгилочар мажмуаларида (СКМ) хавфсизликни таъминлаш бўйича текширувлар кетмоқда, деб хабар беради Ўзбек телеграф агентлиги (ЎзТАГ).

Улар 2018 йил 12 июл куни Ўзбекистон пойтахтининг Юнусобод туманида жойлашган “Кристал” супермаркет биносида содир бўлган ёнғиндан сўнг ўтказмоқда.

Тошкент ИИББ маълумотларига кўра, ҳозирги вақтда пойтахтдаги ҳар бир йирик савдо-кўнгилочар мажмуаларида ёнғин хавфсизлигини таъминлашга қаратилган ташкилий тадбирлар кўрилаётганлиги юзасидан комплекс ўрганишлар ўтказилмоқда.

Ўрганишларда асосий эътибор объектларни ёнғинни автоматик равишда сезиш ва овозли хабар бериш, шунингдек, тутунни ҳайдаб чиқариш қурилмаларининг созлигига қаратилмоқда.

Шунингдек, заҳира чиқиш йўлларининг ҳолатига, ёнғин вақтида йўналишни кўрсатувчи белгилар ва авария ёритиш тизими мавжудлигига, бирламчи ёнғин ўчириш воситаларининг созлигига, марказлар ходимларининг ёнғин ёки бошқа фавқулодда ҳолатлар содир бўлганда ўз вазифаларини қай даражада билишлари ўрганилиб, аниқланган камчиликларни бартараф этиш чоралари кўрилмоқда.

Бундан ташқари, СКМлари ишчи хизматчиларига содир бўлиши мумкин бўлган ёнғинларни бартараф этиш ва инсонларни тезда эвакуация қилишни ташкил этиш бўйича тушунтириш ишлари олиб борилмоқда.

Шунингдек, пойтахт ҳудудида жойлашган йирик савдо-кўнгилочар мажмуаларида Ёнғин хавфсизлиги хизмати ходимларининг тун-у кун навбатчилиги ташкил этилган.

Сурат манбаи: https://www.nur.kz/1725801-nazvany-nebezopasnye-dla-posesenia-tc-v-almaty.html