Куч тизими ходимлари Самарқанд қишлоқ хўжалик институти юристини пора олаётган пайтида қўлга олдилар

Тошкент. 2 август. ЎзТАГ – Ҳуқуқни муҳофаза қилиш органлари ходимлари Самарқанд қишлоқ хўжалик институти (СамҚХИ) юристини ушбу ОТМга киритиш учун валютада пора олаётган пайтида ашёвий далиллар билан бирга қўлга олдилар, деб хабар беради Ўзбек телеграф агентлиги (ЎзТАГ) МХХ хабарига асосланган ҳолда.

Самарқандда яшовчи аёл органларга мурожаат қилиб, СамҚХИ юристи Садридин Бобаев ундан танишининг болаларини иқтисодиёт ва менеджмент факультетларига киритиш учун $10,5 минг сўраётганини маълум қилди.

“Аризачи Бобаев билан ОТМ биносида танишганини айтиб берди. Аёл танишларининг СамҚХИ кириш ниятидагилигини билган юрист бунда ёрдам беришга ваъда беради. У қабул комиссияси аъзосилигини айтиб, $10,5 минг эвазига киритишни таклиф этади”, – дейилади куч тизими хабарида.

Ариза асосида махсус гуруҳ тузилиб, порахўрни қўлга олиш бўйича операция ўтказилди. Натижада Бобаев ўз хизмат хонасида пулни олаётгани пайтида ушланди.

Садридин Бобаевга нисбатан Ўз.Р. Жиноят кодексининг 210 моддасида кўзда тутилган жиноят белгилари бўйича жиноий иш очилди.