Курьерлик хизматлари ўзбек ҳукуматидан уларнинг почта операторлари мақомини тасдиқлашини сўрашмоқда
Тошкент. 28 январ. ЎзТАГ – Ўзбекистонда почта-курьерлик хизматлари кўрсатувчи 24 хусусий компания мамлакат ҳукуматига уларнинг почта операторлари мақомини тасдиқлашини сўраб мурожаат қилди. Бу ҳақида кўрсатилган компанияларнинг маҳаллий ОАВда эълон қилинган Вазирлар Маҳкамасига жамоавий хатидан маълум бўлди.
Гап шундаки, январ ўртасида ДБҚ Ўзбекистонда жисмоний шахслар номига йўлланган куръерлик жўнатмалари божхона тўловларини тўлашда имтиёзларсиз расмийлаштирилиши ҳақида хабар тарқатган эди. Шундан келиб чиққан ҳолда онлайн-дўконлар орқали сотиб олинган ва курьерлик хизматлари томонидан етказиб берилаётган товарлар улар қийматидан қатъи назар импорт божига тортиладиган бўлди. Қонунчиликка мувофиқ, Ўзбекистонга почта жўнатмалари орқали олиб келинаётган қиймати $1 мингдан кам бўлган импорт товарлар божхона божи ва йиғимларига тортилмайди.
“Ушбу амалиёт почта алоқаси ҳақидаги амалдаги қонунчиликка зид, имтиёзларнинг фақат миллий почта операторига нисбатан сақлаб қолиниши антимонопол қонунчиликнинг бузилишидир”, - деб таъкидланади хатда.
Шунингдек, хатда “ушбу чеклашлар қўлланган ҳолда почта оператори бўлган компаниялар катта зарар кўради, ўз вазифаларини бажара олмайди, бу эса юридик ва жисмоний шахсларнинг молиявий йўқотишларига олиб келади ҳамда амалдаги халқаро почта алоқаси амалиётига зиён келтиради”, - деб таъкидланади.
Эслатиб ўтамизки, январ бошида Ўзбекистонда жисмоний шахслар томонидан хусусий интернет-савдо операторлари орқали жўнатилган почта посилка ва ўтказмалар берилиши тўхтатиб қўйилган эди. Кейинги уч йилда Ўзбекистонда онлайн-дўконлар орқали импорт товарлар сотиб олиш урф бўлди. Турли баҳоларга кўра, мамлакатда ишлаётган почта-курьерлик операторларининг савдо айланмаси йилига $20 млндан $50 млнгачани ташкил қилади.
