МАГАТЭ Ўзбекистон мутахассислари учун семинар ўтказмоқда

Тошкент. 5 феврал. ЎзТАГ – 4-6 феврал кунларии Атом энергетикаси бўйича халқаро агентлиги (МАГАТЭ) Тошкентда ўзбекистонлик мутахассислар, “Ўзатом” агентлиги ва “Росатом” давлат корпорацияси вакиллари иштирокида атом электр станцияси (АЭС) учун майдон танлашда хавфсизлик ва бошқа муҳим жиҳатлар бўйича семинар ўтказмоқда, деб хабар беради Ўзбек телеграф агентлиги (ЎзТАГ).

Семинардан кўзланган асосий мақсад “Ўзатом” агентлиги ва бошқа алоқадор агентликлар мутахассислари учун МАГАТЭ хавфсизлик тартиб ва талаблари бўйича маслаҳат, йўл-йўриқлар кўрсатишдан иборат.

“Ўзатом”дан хабар беришларича, ўзбек томони иштирокчиларга ҳозирги пайтда мамлакатда АЭС учун майдон танлаш ишларининг ҳолати ҳақида маълумот берилди. 

Семинар жараёнида кенг доирадаги масалалар, шу жумладан, АЭС учун майдон танлашда экологик жиҳатлар, атом электр станцияси учун инфратузилмани ривожлантиришда МАГАТЭ талабининг аҳамияти, МАГАТЭ хавфсизлик стандартларига мувофиқ лицензиялаш жараёни, МАГАТЭнинг атроф-муҳитга таъсирни баҳолаш ва атом-энергетика муаммоларини ишлаб чиқиш бўйича ёндашуви каби масалалар муҳокама қилинди. 

Семинар МАГАТЭнинг АЭС қуриш бўйича лойиҳани амалга ошираётган мамлакатлар учун қўллаб қувватлаш жиҳатларини ҳам ўз ичига олади. Шунингдек, МАГАТЭнинг АЭС қуриш учун майдон танлаш ва уни баҳолаш билан боғлиқ бўлган хавфсизлик нормалари бўйича қўшимча ҳужжатлар ҳам тақдим қилинган. 

Эслатиб ўтамиз, 2018 йил 7 сентябрда Россия ва Ўзбекистон бош вазирлари Россия лойиҳаси асосида атом электр станциясини қуришда ҳамкорликка доир ҳукуматлараро битимни имзолаган эдилар. Лойиҳа ВВЭР-1200 турдаги реакторли 2 та энергоблоклар қурилиши кўзда тутади. Ўзбекистондаги АЭСнинг биринчи энергоблокини 2028 йилнинг охиригача ишга тушириш режалаштирилган.

Сурат манбаи: http://gtn.uz