Марғилонда пул ундириш ва мулкни тортиб олиш билан шуғулланган жиноий гуруҳга ҳукм ўқилди

Тошкент. 22 ноябр. ЎзТАГ – Жиноят ишлари бўйича Марғилон шаҳар суди транспорт соҳасида пул ундириш ва мулкни тортиб олиш билан шуғулланган жиноий гуруҳга ҳукм чиқарди, деб хабар беради Ўзбек телеграф агентлиги (ЎзТАГ) суд қарорига асосланган ҳолда. 

Марғилонда яшовчи олти кишидан иборат жиноий гуруҳ тадбиркорлардан ноқонуний пул ундириш, уларнинг мулкни тортиб олиш ва лицензиясиз транспорт фаолияти билан шуғулланган.

Жиноятчилар тадиркорлар ва уларнинг оила аъзоларига жисмоний таҳдид қилиб, йирик миқдорда пул талаб қилган. Масалан, фақат 2015 йилнинг майидан 2016 йил феврали орасида улар ноқонуний равишда 85 млн сўмдан ортиқ пулни ундиришган. Бу маблағлар йўловчилар ташиш билан шуғулланган “Марғилон Буюк Ипак Йўли” ширкатига тегишли бўлган. 

Бундан ташқари, жиноятчилар юқорида номи келтирилган ширкат раҳбарини 55 млн сўмлик “Ласетти” автомобили ва корхонанинг 25% улушини жиноий гуруҳ аъзоларидан бирининг номига ўтказишга мажбурлашган.

Гуруҳ аъзоларига Жиноят кодексининг тегишли моддалари бўйича айблар қўйилди. Гуруҳнинг тўрт фаол аъзосининг ҳар бири 11 йилдан зиёдга қамалди. Икки кишига 2 йилдан 3 йилгача ахлоқ тузатиш ишлари жазоси (маошининг 30% ушлаб қолган ҳолда) белгиланди.