Марказий банк ва Moody's Тошкентда конференция ўтказдилар
Тошкент. 13 апрел. ЎзТАГ –Ўзбекистон Республикаси Марказий банки ва Moody's ҳалқаро рейтинг агентлиги ҳамкорлигида Тошкентда тижорат банклари томонидан халқаро рейтинг баҳоларига эга бўлиш масалаларига бағишланган конференция ўтказилди, деб хабар беради Ўзбек телеграф агентлиги (ЎзТАГ).
Конференцияда 300дан ортиқ иштирокчилар қаторида тижорат банкларининг раҳбар ва масъул ходимлари иштирок этдилар.
“Конференция давомида Moody's ҳалқаро рейтинг агентлиги таҳлилчилари томонидан жаҳон иқтисодиётидаги ўзгаришлар ва уларнинг МДҲ мамлакатларига таъсири, иқтисодий нобарқарорлик оқибатларининг активлар сифати, банк тизимининг ташқи зарбаларга мойиллиги, шунингдек банк назорати бўйича Базель қўмитасининг “Базель III стандартлари” тавсияларини тадбиқ этиш тажрибалари билан ўртоқлашдилар” - деб хабар беришди Марказий банкда.
Бундан ташқари, экспертлари кредит рейтингини тақдим этиш методологияси бўйича батафсил маълумот бердилар ва Ўзбекистон банк тизимида олиб борилаётган ислоҳотлар натижалари бўйича ўз мулоҳазаларини билдирдилар.
Конференцияда банк тизимида олиб борилаётган изчил ислоҳотлар ва Марказий банкнинг самарали банк назорати, жумладан, активлар сифати, кредит портфелини диверсификация қилиш, капитал етарлилиги ва ликвидлик кўрсаткичлари устидан доимий мониторинг ўрнатилиши мамлакатимиз банкларининг барқарор фаолият юритиши учун зарур шароитларни ҳозирлаётгани қайд этилди.
Конференция давомида билдирилган тавсия ва хулосалар республика банк тизимида олиб борилаётган ислоҳотларни янада чуқурлаштириш, унинг барқарорлигини ошириш, етакчи халқаро рейтинг агентликлари стандартлари ва баҳолаш кўрсаткичлари асосида тижорат банклари фаолиятини баҳолашдаги ёндашувларни такомиллаштириш, пировардида банклар фаолиятини илғор халқаро тажрибаларга мувофиқ ташкиллаштиришга замин яратади.
