Matiz Россияда энг оммавий аёллар автомобили деб тан олинди
Тошкент. 14 ноябр. ЎзТАГ – Ўзбекистонда ишлаб чиқарилаётган Matiz автомобили Россияда энг оммавий аёллар автомобили деб тан олинди, дея хабар қилади Ўзбек телеграф агентлиги (ЎзТАГ).
Бу “Йил автолари рейтинги” тадқиқоти якунлари бўйича маълум бўлди. Ушбу тадқиқот иштирокчилари энг қулай, энг савлатдор, аёлларга энг мос келувчи ва энг оилавий автомобилни аниқладилар. “Российская газета”нинг хабарига кўра, респондентлар россия бозорида сотилаётган 452 авто моделлари орасидан танлашларига тўғри келди.
“Энг оммабоп аёллар автомобили” номинациясида Uz-Daewoo Matizга рақиб топилмади. Кейинги ўринларни эса Audi A3/S3 ва Opel Corsa моделлари олди.
Энг қулай автомобиль деб Hyundai Solaris топилди. Иккинчи ўрин Renault Duster моделига насиб қилди. Учинчида эса Ford Focus машинаси. Ford Focus автомобили энг оилавий автомобиль деб тан олинди. Кейинги ўринларда LADA Largus ва Jeep Grand Cherokee моделлари бормоқда. Бозордаги энг савлатдор машина деб респондентлар “Гелендваген” - Mercedes-Benz G-Classни топдилар. Ушбу номинацияда иккинчи Land Rover Defender ни ортда қолдирган UAZ Hunter модели бўлди.
