Майамидаги ATP Masters 1000 турнирининг биринчи доирасида Денис Истомин хорват Борн Чоричга қарши чиқади
Тошкент. 24 март. ЎзТАГ – Бутун тошкент вақти билан 20.00да Майамидаги ATP Masters 1000 турнирининг биринчи доирасида Ўзбекистоннинг биринчи ракеткаси Денис Истомин хорват Борна Чоричга қарши майдонга тушади, деб хабар беради Ўзбек телеграф агентлиги (ЎзТАГ).
Ҳозирда 29 ёшли Денис АТР рейтингининг 76-, 19 ёшли вундеркинд Борна эса 46-поғонасида.
“Евроспорт” сайтидаги ставкалар Чорич фойдасига 72%га 28% нисбатида.
Теннисчилар ўзаро бир марта учрашганлар. Жорий йилнинг 16 февралида улар Марселдаги АТР турнирининг илк раундида учрашиб, унда хорват 6:4, 7:5 ҳисобида ғалаба қилган. Кейинги доирада эса Чорич уч сетда турнирнинг бўлажак ғолиби француз Жил Симонга бой берган.
Майамидаги турнирга келсак, Истомин-Чорич жуфтлиги ғолиби иккинчи раундда жаҳоннинг 2-ракеткаси британиялик Энди Маррейга қарши тушади. Турнирда жаҳоннинг энг кучли теннисчиси серб Новак Жокович ҳам қатнашмоқда.
Эслатиб ўтамизки, Miami Masters Ки-Бискейнда (Майами, АҚШ) ўтказиладиган профессионал теннис турнири бўлиб, маҳаллий Tennis Center at Crandon Park қаттиқ қопламали кортларида март ойида ўтказилади. 2009 йилдан бери соврин жамғармаси $5,3 млнлик эркаклар турнири ATP Masters 1000 сериясига киради. Унда 96 иштирокчи яккаликда ва 32 жуфтлик иштирок этади.
