“Мен ўғлимнинг бу фожеага алоқаси борлигига ишонгим келмайди” – Раиса Мирзаева

Тошкент. 22 июл. ЎзТАГ – Ўзбекистон миллий телерадиокомпаниясининг марҳум диктори Раҳматилла Мирзаевнинг собиқ умр йўлдоши Раиса Мирзаева ўғли Умиднинг ўз отаси ўлимига алоқаси борлигига ишонмайди. Бу ҳақида у “Даракчи” газетасига интервьюсида гапириб берди.

Р. Мирзаев билан сўнгги учрашуви ҳақида гапирар экан Раиса Мирзаева “(...)15 февраль куни. У уйимизга Умиднинг тўйи хақида гаплашиш учун келган эди. 27 феврал куни эса оҳирги марта телефон орқали гаплашдик. Гап Рахматилла аканинг ўлимидан бир неча кун олдин Умидга Ласетти автомобилини совға қилганлиги хақида борди. Умиднинг “Спарк”и борку, нима учун янги машина керак бўлди?”, деган гапимга: “Мен Умидга бир йилдан сўнг яхшироқ машина олиб бераман деб ваъда берган эдим”, – деб таъкидлади.

“Мен ўғлимнинг бу фожеага алоқаси борлигига ишонгим келмайди” – деди дикторнинг собиқ хотини.

Унинг сўзларига кўра, ўғли учун отаси доим идеал киши бўлиб келган.

У, шунингдек, Раҳматулла Мирзаев билан севишиб турмуш қургани ва улар биргаликда деярли 30 йил бахтли яшаганини қўшимча қилди.

Р.Мирзаеванинг сўзларига кўра, оиланинг бузилишига бир аёл киши сабаб бўлган ва ажралишганларидан сўнг Р.Мирзаев “йиллар давомида оилани тиклашга ҳаракат қилган”.

Бундан олдинроқ Бош прокуратура МТРК таниқли диктори ўлимида унинг ўғли Умиднинг ҳам қўли борлигини хабар қилган эди. Бошланғич тергов якунлари бўйича фуқаролар Кахрамон Шоазизов ва Умид Мирзаев Жиноят кодексининг тегишли моддалари билан айбланиб, иш кўриб чиқиш учун судга йўлланган эди.

Эслатиб ўтамизки, 2015 йилнинг 2 мартида Зангиота туманида яшовчи Раҳматулла Мирзаевнинг кўплаб пичоқ излари бўлган жасади ўз ҳовлисидан топилган эди.