Microsoft Тошкент олий таълим муассасаси талабаларига Microsoft Imagine дастурини тарқатди
Тошкент. 3 апрел. ЎзТАГ – “Microsoft” компанияси Тошкент шаҳридаги Инҳа университети (IUT) талабаларига ўзининг лицензияли дастурий таъминот ҳамда ишланмаларидан бепул фойдаланиш имкониятини яратди, деб хабар беради Ўзбек телеграф агентлиги (ЎзТАГ).
IUT маълумотига кўра, “Microsoft” компанияси вакиллари Тошкент шаҳридаги Инҳа университети (IUT) маъмуриятига “Microsoft Imagine”нинг 700 дона ваучерини топширди.
Унинг ёрдамида IUT талабаларига “Windows” операцион тизимидан, “Microsoft Azure”, “Visual Studio”, “SQL Server”, “Xamarin” ва бошқа дастурий таъминотлардан бепул фойдаланишлари мумкин.
Шунингдек, “Microsoft Imagine” дастури талабалар ўзларининг малакаларини ошириб олишлари учун амалий машғулотларга йўл очади.
Қайд этиш зарурки, “Microsoft” компанияси мана уч йилдирки, Тошкент шаҳридаги Инҳа университети талабалари учун ўзининг ечимларидан бепул фойдаланиш имкониятини тақдим этмоқда.
ОТМ маъмуриятининг таъкидлашича, Инҳа университети ҳамда “Microsoft” компанияси ўртасидаги ҳамкорлик келажакнинг етакчи IT-мутахассисларини етиштириб беришда ўз ҳиссасини қўшади.
