Миллий кутубхонада Даун синдроми билан касалланган болалар иштирокида шеърхонлик ва рақс кечаси бўлиб ўтди

Тошкент. 16 апрел. ЎзТАГ – Ўзбекистон Миллий кутубхонасида Даун синдроми билан касалланган болалар иштирокида шеърхонлик ва рақс кечаси бўлиб ўтди, деб хабар беради Ўзбек телеграф агентлиги (ЎзТАГ).

“Олам имкониятлари сен учун” деб номланган кеча “Trening Studiya DAR” ОАЖ билан ҳамкорликда ташкил қилинди.

Тадбирнинг ўтказилишидан асосий мақсад имконияти чекланган инсонларни ўзларига бўлган ишонч ва салоҳиятларини кучайтириш, уларнинг жамиятда фаол иштирокчи бўлиб етишишларига кўмаклашиш бўлди.

Миллий кутубхона маълумотларига кўра, тадбирда имконияти чекланган, Даун синдроми билан касалланган болалар ва Шайхонтохур тумани 41-мактаб ўқувчилари қатнашдилар. Тадбир доирасида имконияти чекланган болалар рақс ва қўшиқлар айтиб ўз маҳоратларини кўрсатиб бердилар.

Эслатиб ўтамизки, “Trening Studiya DAR” мунтазам равишда тренинг, семинар, мастер-класслар ўтказади ва индивидуал маслаҳат бериш орқали уйда ўтириб қолган ва айрим вазият туфайли маънавий жиҳатдан жамиятдан ажралиб, яккаланиб қолган имконияти чекланган инсонларга ёрдам беришга ҳаракат қилади.

Сурат манбаи: http://uza.uz/uz/society/ziyo-maskanlari-va-ilgor-texnologiyalar-06.02.2012-20594