Минтақада улкан плотина ва йирик ГЭС қуриш экологик муаммоларни оғирлаштиради – ТИВ
Тошкент. 10 декабр. ЎзТАГ – Минтақада улкан плотина ва йирик ГЭС қуриш экологик муаммоларни оғирлаштиради, деди Ўзбекистон ТИВ ўринбосари, Европада Хавфсизлик ва ҳамкорлик ташкилоти Ташқи ишлар вазирлари кенгашининг (ЕХҲТТИВК) 22-йиғилишида иштирок этаётган ўзбек делегацияси раҳбари Дилёр Ҳакимов ушбу йиғилишда қилган чиқишида, деб хабар беради Ўзбек телеграф агентлиги (ЎзТАГ).
“Бугун кўлами ва вайронагарчилиги жиҳатидан тенгсиз ва глобал, олдиндан айтиш қийин, қўпинча фожеавий бўлган экология ва иқлим ўзгариши муаммолари халқаро ҳамжамият диққат марказида бўлиб турибди”, - деб таъкидлади Д.Ҳакимов.
Унинг сўзларига кўра, ушбу қаторда янги тарихдаги энг йирик экологик ҳалокат – Орол денгизи фожеаси алоҳида ўрин эгаллайди.
Денгизнинг қуриши оқибатида нафақат Марказий Осиё, балки ундан бошқа жойларда ҳам аксини кўрсатаётган иқлим ўзгариши келиб чиқди, деб таъкидлади Ҳакимов.
Ўзбек делегацияси раҳбари фикрига кўра, “Орол фожеасининг ҳалокатли таъсири бутун дунёга таҳдид солмоқда. У Марказий Осиёда яшаётган 65 млн кишининг ҳаёти ва генофондига жиддий таъсир ўтказди”.
Ўта ёмон экологик муҳит, ичимлик сувининг етишмаслиги ва сифати ёмонлиги, хавфли касалликларнинг ўсиши – ушбу фожеа оқибатларининг қисқача, лекин тўлиқ бўлмаган рўйхатидир, деди у.
“Айнан шу сабабли ҳам Ўзбекистон Амударё ва Сирдарё ирмоқларида улкан плотина ва йирик ГЭС қуриш режаларига йўл бера олмайди. Чунки ушбу дарёлар ҳавзасида миллионлаб кишиларнинг ҳаёти таъминланади, ушбу дарёлар табиий ўзанлари бузилди, сув таъминоти янада ёмонлашди, бу эса экологик мувозанат кескин ёмонлашишига, Орол денгизи муаммоси оғирлашиши ва бутун минтақада экологик хавфсизлик издан чиқишига олиб келди”, - деб таъкидлади ўзбек делегацияси раҳбари.
Вазир ўринбосари фикрига кўра, Марказий Осиёдаги сув-энергетика муаммоси масалалари халқаро ҳуқуқнинг сув ресурсларини адолатли ва оқилона тақлимлашга кафолат берувчи, барча минтақа мамлакатлари манфаатларини ҳисобга олувчи умум тан олинган меъёрларига мувофиқ кўриб чиқилиши зарур.
