Мирзиёев БМТ инсон ҳуқуқлари бўйича кенгашининг махсус маърузачисини қабул қилди

Тошкент. 25 сентябрь. ЎзТАГ – Ўзбекистон президенти Шавкат Мирзиёев БМТ инсон ҳуқуқлари бўйича кенгашининг махсус маърузачисини қабул қилди, дея хабар беради Ўзбек телеграф агентлиги (ЎзТАГ).

"25 сентябрь куни президент БМТнинг инсон ҳуқуқлари бўйича кенгаши махсус маърузачисини судьялар ва адвокатлар мустақиллиги масаласида ишчи ташриф билан мамлакатда бўлиб турган Диего Гарсия-Саяни қабул қилди", - дейилади давлат раҳбари матбуот хизмати хабарида.

Учрашувда ўзаро ҳамкорликнинг истиқболли йўналишлари юзасидан фикр алмашилди, қонунчиликни янада такомиллаштириш ва суд-ҳуқуқ соҳасида қўшма тадбирлар ўтказиш масалалари муҳокама қилинди.

БМТ Кенгашининг махсус маърузачиси давлатимиз раҳбари ташаббуси билан давлат ва халқ ўртасидаги тўғридан-тўғри мулоқот механизмлари орқали фуқаролик жамиятини ривожлантириш, қонунийлик ва қонун устуворлигини мустаҳкамлаш, адлияда адолатни таъминлашга қаратилган ислоҳотларни юксак баҳолади.

БМТ вакили Ўзбекистонда демократик ислоҳотларни амалга оширишда конструктив ҳамкорликни давом эттириш ва амалий ёрдам кўрсатишга тайёр эканини таъкидлади.

Сурат манбаи: president.uz