Мирзиёев МДҲ давлатлари ҳуқуқни муҳофаза қилувчи органлари раҳбарларини қабул қилди

Тошкент. 31 май. ЎзТАГ – Ўзбекистон президенти Шавкат Мирзиёев МДҲ давлатлари ҳуқуқни муҳофаза қилиш органлари раҳбарларини қабул қилди, дея хабар беради Ўзбек телеграф агентлиги (ЎзТАГ).

"Ш. Мирзиёев 31 май куни Тошкент шаҳрида бўлиб ўтаётган тадбирларида иштирок этаётган МДҲ мамлакатлари Ички ишлар вазирликлари ва идоралари делегациялари раҳбарларини қабул қилди", - дейилади президент матбуот хизмати хабарида.

Қайд этилганидек, Озарбайжон, Арманистон, Беларус, Қозоғистон, Қирғизистон, Россия, Тожикистон ва Туркманистон делегациялари Тошкентга келди.

"Бугунги кунда МДҲ Ички ишлар вазирлари кенгаши терроризм, экстремизм, наркотрафик, уюшган жиноятчилик ва одам савдосига қарши курашда самарали ҳамкорлик, илғор тажриба ва билим алмашиш, шунингдек, яқин мувофиқлаштиришнинг муҳим механизми ҳисобланади", - дейилади хабарда.

Кенгаш фаолиятининг натижадорлиги кейинги 5 йилда ҳамдўстлик майдонларида содир этилган жиноятларнинг 25 фоиздан ортиққа камайгани шундан далолат беради.

Бундан ташқари, қўшма операциялар доирасида 2018 йилда наркотикларни ноқонуний муомалага чиқарган 892 нафар шахс фаолияти тўхтатилди, шунингдек, 84 нафар жиноятчи қўлга олинди.

"Учрашувда МДҲ давлатлари Ички ишлар органлари ҳамкорлигини кенгайтириш, жумладан, идоралараро самарали ҳамкорликни ташкил этиш, қўшма тадбирлар ўтказиш, кадрлар тайёрлаш соҳасидаги дастурларни амалга ошириш истиқболлари кўриб чиқилди", - дейилади хабарда.

Шунингдек, минтақавий хавфсизликнинг долзарб масалалари, жумладан, Афғонистондаги вазиятни тинч йўл билан ҳал қилиш ва трансмиллий жиноятчиликка қарши курашда ҳамкорликни мустаҳкамлаш юзасидан фикр алмашилди.

"Ўзбекистонда ҳуқуқбузарликларнинг барвақт олдини олиш ва профилактикасининг самарали тизимини шакллантиришга қаратилган ҳуқуқни муҳофаза қилиш тизимида амалга оширилаётган ислоҳотлар натижадорлиги юқори баҳоланди", - дея хабар беради.

Шунингдек, Ҳамдўстлик мамлакатлари ҳуқуқни муҳофаза қилиш тузилмаларининг умумий хавф-хатар ва таҳдидларга қарши курашиш борасидаги саъй-ҳаракатларни ўзаро қўллаб-қувватлаш ва бирлаштириш мақсадида фаол ҳамкорликни янада ривожлантиришга тайёрлиги таъкидланди.

Ш. Мирзиёев МДҲ Ички ишлар вазирлари Кенгашининг навбатдаги мажлисини муваффақиятли ўтказишни тилади.

Сурат манбаи: president.uz