Мирзиёев Наманган вилояти тадбиркорларининг муаммоларини ҳал қилиш бўйича кўрсатма берди
Тошкент. 3 май. ЎзТАГ – Ўзбекистон Президенти Шавкат Мирзиёев Наманган вилояти тадбиркорларининг муаммоларини ҳал қилиш бўйича кўрсатма берди, деб хабар беради Ўзбек телеграф агентлиги (ЎзТАГ).
Бу кўрсатмани у Наманган шаҳридаги “Орзу” кичик саноат зонасига қилган ташрифи доирасида берди.
“Саноат зонасининг ҳудуди салкам ўн гектарни ташкил этади. Бу ерда енгил саноат, озиқ-овқат, электротехника, тиббий техника, полиграфия товарлари ишлаб чиқаришга оид 22 лойиҳани амалга ошириш мўлжалланган. Биринчи босқичда 2 минг 250, иккинчи босқичда 1 минг 700 янги иш ўринлари яратилади. Саноат ҳудуди фаолиятида қатнашишни истаган тадбиркорлар ўз соҳасида тажриба ва ишончли ҳамкорларга эга”, - дейилади Ўзбекистон президентининг матбуот хизмати хабарида.
Давлатимиз раҳбари ушбу кичик саноат зонасининг имкониятлари, лойиҳаларнинг иқтисодий самарадорлиги билан қизиқди, дейилади яна хабарда.
“Президент тадбиркорлар билан суҳбатда масъул шахсларга ишбилармонларнинг муаммоларини ҳал қилиш ва маҳсулотларни сотишда кўмаклашиш бўйича топшириқлар берди. Хорижий технологияларни жалб қилиш учун маблағлар ажратиш, корхонанинг ташқи бозордаги фаоллигини ошириш зарурлигини қайд этди”, - дейилади хабарда.
Сурат манбаи: http://uza.uz/oz/society/350-aydovchi-avtotest-samarqand-dan-sertifikat-oldi-24-01-2018?ELEMENT_CODE=350-aydovchi-avtotest-samarqand-dan-sertifikat-oldi-24-01-2018&SECTION_CODE=society&print=Y
