Мирзиёев Тошкентдаги қатор объектларни кўздан кечирди
Тошкент. 10 октябрь. ЎзТАГ – 9 октябрь куни Ўзбекистон президенти Шавкат Мирзиёев Тошкентдаги қатор объектларга ташриф буюрди, деб хабар беради Ўзбек телеграф агентлиги (ЎзТАГ). Tashkent City
Президент матбуот хизматининг маълум қилишича, Олмазор туманида Ш.Мирзиёев "Olmazor business city" бизнес марказига, янги жойга қурилган Тошкент чинни заводига, Шайхонтоҳур туманида – конгресс зали ва "Hilton" меҳмонхонасига (Tashkent City халқаро бизнес марказининг биринчи объектларига) ташриф буюрди.
"Olmazor business city"га ташрифи чоғида қурилиш ишлари ҳақида батафсил маълумот берилди. Шу билан бирга, маҳаллий қурилиш материалларидан фойдаланилаётгани, хонадонлар ўзимизда ишлаб чиқарилаётган маиший техника ва мебеллари билан тўлиқ жиҳозланиши таъкидланди. Шу ернинг ўзида Олмазор тумани фаоллари билан учрашув бўлиб ўтди.
Шунингдек, президент Тошкент чинни заводига ҳам ташриф буюрди. Бу ерда завод фаолиятини кенгайтириш, уни кластерга айлантириш, кўплаб хотин-қизлар ва ёшларни ишга жойлаштириш бўйича кўрсатмалар берилди. Шунингдек, давлатимиз раҳбари чинни буюмлари музейига ташриф буюриб, завод фахрийлари билан суҳбатлашди. Шу ерда саноат ва инвестиция лойиҳалари тақдимоти ўтказилди. Президентимиз Тошкентда экспортни ривожлантириш, ташқи савдо операцияларига кўмаклашиш учун замонавий мультимодал логистика марказини ташкил этишни таклиф қилди.
Шундан сўнг президент конгресс зали ва "Hilton" меҳмонхонаси билан танишди. Давлатимиз раҳбари конгресс залининг ҳар бир зали ва меҳмонхонада яратилган шарт-шароитлар, шунингдек, бизнес марказининг “юраги”да ташкил этилган боғ билан танишди.
Сурат манбаи: president.uz
