Мирзиёев Қуролли Кучлар Академиясининг янги биносида бўлди

Тошкент. 11 январ. ЎзТАГ – Ўзбекистон Президенти Шавкат Мирзиёев Қуролли Кучлар Академиясининг янги биносида бўлди, деб хабар беради Ўзбек телеграф агентлиги (ЎзТАГ).

Давлат раҳбари матбуот хизматининг хабар беришича, янги бино Ўзбекистон Республикаси Қуролли Кучларининг 26 йиллиги арафасида фойдаланишга топширилган.  

Замонавий қиёфа касб этган Академияда таълим жараёнига энг янги усул ва технологиялар жорий этилган. Аудиториялар замонавий тренажёрлар, ўқув-лаборатория ускуналари ва компьютер техникаси билан жиҳозланган.

Президент бу ерда яратилган шароитлар билан танишди. Ўқув хоналари, музей, ошхона, курсантлар ётоқхоналарида бўлиб, уларнинг таълим олиши, ҳарбий машғулотларни бажаришини кўздан кечирди, курсантларни Ўзбекистон Республикаси Қуролли Кучларининг 26 йиллиги билан табриклади. Уларнинг аждодларимизга муносиб авлод бўлиб, замонавий билимларни пухта эгаллаши лозимлигини таъкидлади.

Эслатиб ўтамизки, 2017 йил январда Президент Тошкент олий умумқўшин қўмондонлик билим юртида бўлиб, мазкур билим юрти замирида мутлақо янги Қуролли Кучлар Академиясини ташкил этиш бўйича топшириқлар берган эди. Давлат раҳбарининг 2017 йил 25 апрелдаги қарори билан Қуролли Кучлар Академияси қайта ташкил қилинди.

Сурат манбаи: https://www.uzdaily.com/articles-id-34648.htm