Мирзиёев Ўзбекистонга ишчи ташрифи билан келган Чеченистон раҳбарини қабул қилди
Тошкент. 17 октябр. ЎзТАГ – Ўзбекистон Президенти Шавкат Мирзиёев 16 октябрда мамлакатга амалий ташриф билан келган Чеченистон Республикаси раҳбари Рамзан Қодировни қабул қилди, деб хабар беради давлат раҳбарининг матбуот хизмати.
“Мирзиёев меҳмонни қутлар экан, олий даражадаги мунтазам учрашувлар Ўзбекистон билан Россия ўртасидаги стратегик шериклик ва иттифоқчилик муносабатларини мустаҳкамлашга, шунингдек, уларни аниқ амалий мазмун билан бойитишга хизмат қилганини алоҳида таъкидлади”, - дейилади хабарда.
Ўзбекистон Президенти жорий йил апрелда Россия Федерациясига олий даражадаги ташриф чоғида имзоланган икки мамлакат ҳудудлари ўртасида ҳамкорлик тўғрисидаги ҳукуматлараро битим турли “тармоқларда яқин ҳамкорлик ва кооперация алоқаларини мустаҳкамлаш йўлида янги имкониятлар яратгани”ни қайд этди.
Таъкидланишича, Шавкат Мирзиёев билан Россия Президенти Владимир Путиннинг яқинда Сочи шаҳрида бўлиб ўтган учрашувида “томонлар ҳудудлар даражасидаги алоқалар фаоллашаётганидан мамнун эканликларини билдириб, ушбу ҳамкорликни қўллаб-қувватлаш”ган.
Суҳбат чоғида Ўзбекистон ва Чеченистон ҳамкорлигини янада ривожлантириш истиқболлари муҳокама қилинди. “Ўзаро савдо ҳажми ва номенклатурасини кенгайтириш, иқтисодий, маданий-гуманитар соҳаларда қўшма дастур ва лойиҳаларни амалга ошириш масалаларига алоҳида эътибор қаратилди”, - дейилади хабарда.
Ўз навбатида, Қодиров Мирзиёевга самимий қабул ҳамда отаси Аҳмад ҳожи Қодиров таҳсил олган ислом цивилизациясининг тарихий марказларини зиёрат қилиш мақсадида мамлакатимизга ташрифини ташкил қилишга кўмаги учун чуқур миннатдорчилик билдирди.
Шунингдек, у “кўп миллатли ўзбек халқига чуқур эҳтиромини билдириб, Президент Шавкат Мирзиёевнинг миллатлараро тотувлик ва диний бағрикенгликни мустаҳкамлаш, ислом динининг асл инсонпарварлик моҳиятини тарғиб қилиш борасида олиб бораётган сиёсати ва халқаро ташаббусларига юксак баҳо берди”.
“Суҳбат сўнгида Рамзан Қодиров икки мамлакат ўртасидаги ўзаро манфаатли ва кўп қиррали алоқаларни ривожлантириш ва мустаҳкамлашда фаол иштирок этишга тайёр эканини таъкидлади”, - деб хулоса қилинади хабарда.
