Мирзиёев Жиззахда маҳалла ва ички ишлар бўлимига ташриф буюрди

Тошкент. 1 феврал. ЎзТАГ – Ўзбекистон президенти Шавкат Мирзиёев Жиззахда маҳалла ва ички ишлар бўлимига ташриф буюрди, деб хабар беради Ўзбек телеграф агентлиги (ЎзТАГ).

“Президент Жиззах шаҳридаги Мирзо Улуғбек маҳалласида бўлиб, ҳудудда қурилиши режалаштирилаётган уй-жойлар, ижтимоий объектлар, ободонлаштириш лойиҳалари билан танишди”, - дейилади давлат раҳбари матбуот хизматининг хабарида.

Қайд этилишича, Жиззах шаҳрини ободонлаштириш, аҳолига муносиб турмуш шароити яратиш бўйича кенг кўламли ишлар бошланган. Шаҳар бош режасига кўра, “Кимёгар”, “Иттифоқ” маҳаллаларида, Мустақиллик кўчасида 5 ва 7 қаватли уйлар қурилади, улар атрофида савдо мажмуалари, клиника, меҳмонхона ҳамда маҳалла идоралари қад ростлайди. Айни пайтда қурилиш бошлаб юборилган. Улар, дейилади шундан кейин, 2022 йилда фойдаланишга топширилиши режалаштирилган.

“Жиззахда туризмни ривожлантириш учун яхши имконият, қулай табиий шароит мавжуд. Сайёҳларда дастлабки таассурот эса шаҳар темир йўл вокзалидан бошланиши табиий. Шу мақсадда Жиззах темир йўл вокзали тубдан реконструкция қилинди. Барча зарур шароитлар яратилган вокзалдан чиқишингиз билан Мирзо Улуғбек маҳалласи бошланади. Бу ерда кенг кўламли бунёдкорлик ишлари бажарилмоқда”, - дейилади хабарда.

Хусусан, вокзал ва Тошкент кўчасини бирлаштирувчи ҳудудда 13 та 894 хонадонга мўлжалланган 7 қаватли уй қурилмоқда. Жиззах шаҳрида, дейилади шундан кейин, вилоят қўғирчоқ театри қурилади. 250 ёш томошабинга мўлжалланган мазкур маскан жорий йил якунига қадар фойдаланишга топширилиши мақсад қилинган. Бунинг учун 12 млрд 700 млн сўмдан ортиқ маблағ йўналтирилган.

Ш. Мирзиёевга вилоят аҳолисини тоза ичимлик суви билан таъминлаш, шаҳар оқова сув тизимини яхшилаш борасидаги ишлар ҳақида маълумот берилди.

Президент аҳолини тоза ичимлик суви билан таъминлаш энг муҳим масалалардан бири эканини таъкидлади. Режадаги ишларни тез ва сифатли бажариш юзасидан топшириқлар берди.

Шунингдек, тақдимотда мамлакат автомобиль йўллари атрофини кўкаламзорлаштириш, йўлбўйи инфратузилмасини яхшилаш бўйича амалга ошириладиган ишлар ҳақида ҳам маълумот берилди.

Бундан ташқари, давлат раҳбари Жиззах шаҳридаги 3-сонли ички ишлар бўлимида ҳам бўлиб, ўтган йилги топшириқлар ижросини кўздан кечирди.

Сурат манбаи: https://president.uz