МХХ Жанубий Кореяда қалбаки ишга жойлаш билан шуғулланган фирибгарни қўлга олди
Тошкент. 16 май. ЎзТАГ – МХХ оператив ходимлари прокуратура органлари билан ҳамкорликда Жанубий Кореяда қалбаки ишга жойлаш, зарур хужжатларни расмийлаштиришда ёрдам беришга ваъда бериб, уларнинг пулларини ўзлаштириш билан шуғулланган фирибгар аёлни қўлга олди, деб хабар беради Ўзбек телеграф агентлиги (ЎзТАГ) куч тизими хабарига асосланган ҳолда.
Тошкентлик 32 ёшли Динара Усмонова хорижда юқори маошли ишга жойлашга ёрдам бериш, шунингдек, зарур хужжатларни расмийлаштиришда ёрдам бериш баҳонасида маҳаллий аҳолидан йирик миқдордаги пулларни олиб келган.
“МХХга аризачи мурожаат қилиб, Усмонова Жанубий Кореяга ўқишга кетишда ёрдам бериш эвазига $1000 сўраётганини билдирган. Ўтказилган операция натижасида фирабгар аёл пулни олаётган пайтида қўлга олинди. У айбини тан олди”, - деб таъкидланади МХХ хабарида.
Терговда Динара Усмонованинг бошқа айблари ҳам очилди. У бирон бир рухсат ва лицензиясиз хорижга ишга кетмоқчи бўлган Ўзбекистон фуқароларини 300 минг сўм эвазига корейс тилига ўқитган. Бунинг учун torg.uz сайтига эълон жойлаштирган.
Ёрдам олишни истаганлардан Меҳнат вазирлиги қошидаги Ташқи меҳнат миграциясининг имтиҳонларида рўйхатдан ўтказиш эвазига $1 минг пул олган. Имтиҳонни яхши топшириш учун эса қўшимча $3 минг талаб қилган. Мижозлар Усмоновага Жанубий Кореяга жўнашни тезлаштириш учун яна $3 минг беришган.
Тошкент вилояти прокуратураси қўлга олинган шахсга нисбатан Жиноят кодексининг қатор моддалари бўйича иш очди.
