Moody’s “Ўзбекинвест”нинг рейтингини “B1” даражасида “Барқарор” прогнози билан тасдиқлади
Тошкент. 27 август. ЎзТАГ – Moody’s халқаро рейтинг агентлиги “Ўзбекинвест” миллий экспорт-импорт суғурта компаниясининг рейтингини “B1” даражасида “Барқарор” прогнози билан тасдиқлади, деб хабар беради Ўзбек телеграф агентлиги (ЎзТАГ).
Агентлик таҳлилчиларининг фикрига кўра, қабул қилинаётган таваккалчиликларга нисбатан юқори капитализация даражаси, экспорт-импорт суғуртачиси сифатидаги мавқе, Ўзбекистон ҳукумати шахсидаги таъсисчи, ширкатни андеррайтинг ва бошқа суғурта экспертизиси билан таъминловчи AIG компанияси билан ҳамкорлик “Ўзбекинвест” компаниясининг кучли томонларига киради.
“Ўзбекинвест” – Ўзбекистон суғурта компаниялари орасида “Moody’s Investors Services Ltd.”дан халқаро рейтинг олган биринчи суғуртачидир”, – деб таъкидлашди компания матбуот хизматида.
Эслатиб ўтамизки, “Ўзбекинвест” Ўзбекистоннинг энг йирик суғурта компаниясидир. У 17 йўналишда суғурта ишлари олиб боради. Ширкатнинг низом жамғармаси $60 млнга тенг.
