Москвада ўзбек таомларига ихтисослашган Ploveberry тамаддихоналар тармоғи очилади
Тошкент. 15 август. ЎзТАГ. Москвалик таниқли рестораторлардан бўлган ака-ука Алексей ва Дмитрий Васильчуклар бу ерда кавказ-шарқ, хусусан, ўзбек таомларига ихтисослашган Ploveberry тамаддихоналари тармоғини ишга тушириш арафасидалар, дея хабар қилади Ўзбек телеграф агентлиги (ЎзТАГ).
РБК Daily газетасининг ёзишига кўра, илк Ploveberry кафеси кейинги ҳафта охирида “Метрополис” савдо марказида очилади. Ploveberry таомномасида кавказ-шарқ таомларига урғу берилади, лекин бу ерда сэндвич ва чучвара каби таомлар ҳам тортилади. Ресторанлар савдо марказлари, кўчаларнинг гавжум жойлари, метрополитен станциялари яқинларида очилади. Биринчи нуқта ишга тушганидан кейин бир йил давомида яна уч-тўртта Ploveberry кафелари ишга тушади. Кейинчалик рестораторлар йилига камида 15 нуқта очишни режалаштирмоқдалар. Битта кафени очишга $1 млн атрофида маблағ сарфланади.
Нашр маълумотларига кўра, бу ака-ука Васильчукларнинг ўзбек таомлари билан боғлиқ биринчи ресторани эмас. Илгари улар томонидан “Чайхона №1” (2001 йилда очилган, 15 кафе-ресторанлар) ва All your need is Plove! ресторанлари очилган бўлиб, улар ҳозиргача муваффақиятли фаолият юритмоқда.
Айни пайтда ўзбек таомлари бутун дунёда оммалашиб бормоқда. Ўзбекистон Ошпазлар уюшмасининг маълумотларига кўра, фақат Москванинг ўзида 253 ўзбек ресторани мавжуд, Нью-Йорк шаҳрида эса кейинги бир неча йил орасида 44 ўзбек ресторани очилган. Бугунда ўзбек таомларини Европанинг кўплаб шаҳарларида татиб кўриш мумкин.
