Москвада Ўзбекистон фуқароси сочини бўяш пайтида оламдан ўтди
Тошкент. 6 июн. ЎзТАГ – Москвада Ўзбекистон фуқароси уй шароитида сочини бўяш пайтида оламдан ўтди, деб хабар беради Ўзбек телеграф агентлиги (ЎзТАГ).
“Московский комсомолец” ёзишича, кўп эҳтимоли билан сочни бўяш 20 ёшли Ўзбекистон фуқароси бўлган қизда нафас қисиш ва томир тортишини келтириб чиқарган. У 2 июнда яқинлари қўлида вафот этди. Шифокорларнинг сўзларига кўра, тўсатдан ўлимга соғлигига енгилтаклик билан муносабатда бўлгани сабаб бўлган.
Холбуки ўша куни ҳеч нарса нохушлик бўлишидан дарак бермаган. Ўша куни кун бўйи опаси Гульназ билан айланиб юрган қиз (касби фаррош) кечқурун уйга келгач, онасидан сочини оч рангга бўяб қўйишни сўраган. Бунинг учун бундан бир йилча аввал фойдаланилган бўёқни ишлатишга қарор қилинган. Жараён оила беш йилдан буён яшаб келадиган Москванинг Стрелбишенский тор кўчасидаги ижара уйда ўтказилган. Шундан кейин Дилнозанинг аҳволи кескин ёмонлашган. Қизнинг боши айланишни ва оғришни бошлаган, уйдагилар унга оғриқ қолдирувчи дори беришган, аммо тез орада қизнинг нафаси бўғила бошлаган ва ҳушидан кетиб, талвасага тушган.
Оиласидагилар Дилнозани кўрпага солиб, ёрдам олиш умидида уйлари ёнидаги туғуруқхона эшигига олиб боришган, шу билан бир вақтда “03” тез ёрдам каретаси ҳам чақирилган. Аммо Дилноза оламдан ўтиб қолади.
Қизнинг ўлимига нима сабаб бўлганини экспертиза аниқлайди. Қариндошлари сўзларига кўра, Дилноза касалманд қиз бўлган, тез-тез юрагидаги оғриқлардан шикоят қилиб турган. Икки ой аввал ҳам у томир тортишини бошидан кечирган, аммо яқинлари қистовига қарамай, шифокорга кўринишдан бош тортган. Соч бўёғининг ўткир ҳиди саломатлиги билан боғлиқ эски муаммоларни қўзғаган бўлиши мумкинлиги ҳам тахмин қилинмоқда.
