“МТС” ўзбек томонига UMSтаги улушини cотиш масаласида ихтиёрий равишда мурожаат қилди – Ахборот технологиялари вазирлиги

Тошкент. 9 август. ЎзТАГ – “МТС” ўзбек томонига UMSтаги улушини cотиш масаласида ихтиёрий равишда мурожаат қилди, деб хабар беради Ахборот технологиялари ва телекоммуниукацияларни ривожлантириш вазирлиги матбуот хизмати.

“МТС” ОАЖ Ўзбекистон томонига ўзининг “Universal Mobile Systems” (UMS) МЧЖ ҚК устав фондидаги 50,01%ни ташкил этувчи улушини ихтиёрий равишда сотиш масаласида мурожаат қилган ҳамда Ўзбекистон томонига нисбатан бирор эътирози мавжуд эмаслигини тасдиқлади”, - дейилади хабарда.

Ўтказилган иккитомонлама музокаралар натижасида ҳамда Ўзбекистон Республикаси қонунчилигига мувофиқ, “Радиоалоқа, радиоэшиттириш ва телевидение маркази” ДУК ҳамда “МТС” ОАЖ ўртасида “МТС” ОАЖнинг “Universal Mobile Systems” МЧЖ ҚК устав фондидаги 50,01% улуши “Радиоалоқа, радиоэшиттириш ва телевидение маркази” ДУК томонидан сотиб олиниши тўғрисидаги шартнома тузилди. Шундай қилиб, “Радиоалоқа, радиоэшиттириш ва телевидение маркази” ДУК “Universal Mobile Systems” мобил алоқа операторининг ягона таъсисчисига айланади.

Таъкидланишича, сотув ҳақидаги қарор мобил алоқа операторининг мижозларга кўрсатаётган хизматларига ўз таъсирини кўрсатмайди.

“Таъсисчиларнинг мазкур қарори мобил алоқа операторининг мижозларга кўрсатаётган хизматларига ўз таъсирини кўрсатмайди. “Universal Mobile Systems” унга тақдим этилган лицензия асосида мобил алоқа бозорида мустақил оператор сифатида фаолиятини олиб боради ва абонентларга хизмат кўрсатишни давом эттиради”, - дейилади хабарда.

Эслатиб ўтамизки, Ўзбекистон ҳукуматининг 2014 йил 31 июлдаги “Мобил алоқа хизматларини кўрсатувчи “Universal Mobile Systems” қўшма корхонасини ташкил этиш тўғрисида”ги 208-сон қарорига мувофиқ, “МТС” ОАЖ ҳамда “Радиоалоқа, радиоэшиттириш ва телевидение маркази” ДУК ўртасида “Universal Mobile Systems” МЧЖ ҚК ташкил этилган эди.

Маълумот ўрнида, UMS мобил тармоғи 2014 йил 1 декабрдан бошлаб хизматлар кўрсатишни бошлаган эди.

2016 йил бошида UMS абонентлари сони 1,095 млн кишига етган эди.