МТС Ўзбекистонда янги уяли алоқа компаниясини ташкил қилади

Тошкент. 23 май. ЎзТАГ – “Система” Акционерлик молия компаниясининг асосий эгаси Владимир Евтушенков унга тегишли МТС компанияси Ўзбекистонга қайтишни режалаштираётганлигини маълум қилди, дея хабар беради Ўзбек телеграф агентлиги (ЎзТАГ) “Ведомости” газетасига асосланган ҳолда.
“Биз улар билан барча шартларни келишиб олдик, фақат битта биз учун принципал аҳамиятга эга бўлган шарт қолди”, - деди Евтушенков Санкт-Петербургда бўлиб ўтган Халқаро иқтисодий форум кулуарларида. Лекин у ана шу шартнинг айнан нима эканлигини айтмади, бироқ унинг частоталар билан боғлиқлигини очиқлади.
“Бу давлат иштирокидаги бошқа компания бўлади. Назорат пакети “Система”да бўлади. Биз катта мамнуният билан ушбу мамлакатга қайтамиз“, – дея қўшимча қилди Евтушенков.
Эслатиб ўтамизки, жорий йил бошида Ўзбекистон собиқ “МТС-Ўзбекистон” частоталарини олган янги миллий уяли алоқа операторини яратишга қарор қилган эди.