Нанкин: курашчи Илҳом Баҳромов Ўзбекистонга яна битта “олтин” келтирди

Тошкент. 27 август. ЎзТАГ – Ўзбекистон жамоасида Нанкин шаҳрида ўтказилаётган II Ўсмирлар ёзги олимпиада ўйинларида олинган яна олтин медал пайдо бўлди. У юнон-рум кураши бўйича мусобақаларда Илҳом Баҳромов томонидан қўлга киритилди, дея хабар қилади Ўзбек телеграф агентлиги (ЎзТАГ).

Ўзбекистон МОҚдан хабар қилишларича, курашчимиз юнон-рум кураши бўйича вазни 50 кг.гача бўлган полвонлар мусобақаси финалида озарбайжонлик Жаббор Нажафовни 3:1 ҳисобида енгди ва шоҳсупанинг энг юксак поғонасига кўтарилди.

Спортчи шарафига Ўзбекистон давлат байроғи кўтарилди ва мамлакат гимни янгради.

Финалга қадар Илҳом Баҳрмов Жазоирлик Хусам Бунасри, Бразилиялик Калебе Фурруйру Коррей, Маршал ороллари вакили Кейсер Мюллерларни енгди.