Наргиз Зокирова буви бўлди

Тошкент. 22 сентябр. ЎзТАГ – Асли келиб чиқиши ўзбек бўлган хонанда Наргиз Зокирова буви бўлди, дея хабар қилади Ўзбек телеграф агентлиги (ЎзТАГ).

Бунга доир маълумот хонанданинг “ВКонтакте” ижтимоий тармоғидаги мухлислар-саҳифасида пайдо бўлди. Хусусан, саҳифада Н.Зокирова 13 сентябрда Ной исмли неварали бўлгани ҳақидаги ёзув мавжуд.

Википедияга кўра, Наргиз Зокирова – АҚШда яшовчи асли келиб чиқиши ўзбек бўлган хонанда.

2013 йилда у америкадаги таниқли X-Factor шоусининг уч босқичидан ўтди, лекин ташкилотчилар қўнғироқ қилмаганларидан кейин россиянинг “Голос” телевизион лойиҳасига йўл олди. Наргиз барча тўрт ҳакамда яхши таассурот қолдирди, бироқ Леонид Агутин жамоасини афзал кўрди. Ўтган йилнинг 20 декабрида конкурс финалига чиқди. Сергей Волчковга сезиларли даражада бой берган ҳолда иккинчи ўринни олди. Аммо хонанданинг ўзи эса “Мен ютганим йўқ, мен ғалаба қилдим”, деб ҳисоблайди.

2014 йилнинг июлида Наргиз Зокирова “Санкт-Петербургнинг оқ тунлари” халқаро мусиқа фестивалининг Гран-присини қўлга киритди.