НАТО қуролли кучларининг Афғонистондан чиқарилиши Ўзбекистондаги радикал исломнинг кучайишига олиб келади
Дата: 09:50, 12-06-2014.
Тошкент. 12 июн. ЎзТАГ - НАТО қуролли кучларининг Афғонистондан чиқарилиши Ўзбекистондаги радикал исломнинг кучайишига олиб келади, дея хабар беради Ўзбек телеграф агентлиги (ЎзТАГ).
Швеция Мудофаа тадқиқотлари институтининг (FOI) Қозоғистон, Қирғизистон, Тожикистон, Туркманистон ва Ўзбекистонлик ҳамкасабалари билан биргаликдаги ҳисоботларида ана шундай хулосага келинган. Ҳисоботдан кўчирмалар Deutsche Welle сайтида эълон қилинган.
НАТО қуролли кучларининг 2014 йил охиригача Афғонистондан чиқарилиши нафақат мамлакат ичидаги вазиятга, балки қўшни мамлакатларга ҳам таъсир қилади. Маъруза муаллифлари Афғонистондан келадиган асосий хавфлар наркотик моддалар контрабандаси, исломизм ва терроризмдир деган хулосага келдилар.
Лекин у ёки бу хавфнинг ҳар бир алоҳида мамлакат учун таъсири турлича бўлишини таъкидладилар. Агар Ўзбекистон учун биринчи навбатда радикал ислом хавф туғдирса, Туркманистон учун чегераларини наркотик моддалар контрабандасига қарши мустаҳкамлаш муҳимдир.
Тожикистонда эса ҳеч қандай хавфлар кутмаяптилар. FOI таҳлилчиси Йохан Нурбергнинг таъкидлашича, у ушбу мамлакатдаги мутахассислардан интервью олганида НАТО кучлари олиб чиқиб кетилганидан кейин ҳеч қандай янги хавфлар пайдо бўлмайди, деган фикрни кўп эшитган.
“Қанчалик кулгили эшитилмасин, улар биз ҳавфсираётган барча муаммолар -наркотрафик, терроризм, ва диний экстремизм уларда мавжудлигини айтишди”, - дейди Нурберг.
Эслатиб ўтамизки, Ўзбекистон президенти Осиёда ўзаро ҳамкорлик ва ишонч чоралари бўйича Саммит (СВМДА) йиғилишида НАТО кучлари Афғонистондан олиб чиқиш муддатларини орқага суришни таклиф қилган эди.
