Навоий тоғ-металлургия комбинатининг музейида фан ҳақида бўлим очилди

Тошкент. 7 июн. ЎзТАГ – Навоий тоғ-металлургия комбинатининг музейида “НТМК ва фан” номли янги бўлим очилди. У тўрт қисмдан иборат, деб хабар беради Ўзбек телеграф агентлиги (ЎзТАГ).

НТМКдан хабар беришларича, биринчи қисмда комбинатда ишловчи 3 доктор ва 33 фан номзодларининг суратлари ва уларнинг фаолиятлари ҳақида маълумотлар мавжуд. Кейинги қисмда илмий-техник ишланмалар, патентлар, илмий қўлланмалар ва “Горный вестник” журналининг қатор сонлари бор.

Экспозициянинг яна бир қисмида Навоий Давлат тоғ институти профессор ва ўқитувчиларининг илмий ишлари, талабаларнинг ишлаб чиқариш амалиётидаги, илмий конференциялардаги суратлари жойлаштирилган.

“НТМК ва фан” бўлимининг сўнгги қисми “Қимматли металллар ва уран геологияси” Илмий-ишлаб чиқариш маркази фаолиятига бағишланган.

Шунингдек, музейда ҳудуд учун характерли бўлган минерал ва тоғ жинсларига бағишланган экспозиция ҳам мавжуд.