Назарбоев Қозоғистоннинг “Нурли йўл” номли янги иқтисодий сиёсатини эълон қилди

Тошкент. 12 ноябр. ЎзТАГ – ҚРнинг президенти Нурсултон Назарбоев Қозоғистоннинг “Нурли йўл” номли янги иқтисодий сиёсатини эълон қилди, дея хабар қилади Қозоқ телеграф агентлиги (КазТАГ).

“Менинг топшириғимга мувофиқ ҳукумат кенг кўламли ривожланиш дастурини ишлаб чиқишни якунлади. Бугун олдимизда турган муаммоларга жавоб тарзида мен Қозоғистоннинг “Нурли йўл” номли янги тараққиёт дастурини эълон қиламан. 2015 йилги Қозоғистон халқига янги мурожаатимни мен айнан ана шу масалага бағишлайман”, – деди Н.Назарбоев Қозоғистон халқига қилган мурожаатида.

Унинг сўзларига кўра, янги иқтисодий сиёсат контрциклик характерда бўлади ва мамлакат иқтисодиётидаги таркибий ислоҳотларни қўллаб-қувватлашга қаратилади.

“Бу нимани англатади? Ташқи бозорларда вазият қулай бўлган, нефт ва бизнинг барча экспорт маҳсулотларимизнинг нархлари яхши даражада бўлган йилларда биз маблағларни Миллий жамғармада тўплаш орқали тежаган эдик”, – деб аниқлаштирди давлат раҳбари.

“Ушбу маблағларни ишлатиб юборишни таклиф қилганларга мен ўша пайтлардаёқ ҳали қийин вақтлар келиши, айнан ўшанда ана шу маблағлар бизга асқотиши ҳақида айтган эдим. Энди ана шундай қиламиз”, – деб қўшимча қилди Н.Назарбоев.

Шу сабабли, унинг сўзларига кўра, “(миллий - КазТАГ) жамғарманинг асосий вазифаларидан бири бизнинг иқтисодиётимизни ташқи таъсирлар олдида барқарор ривожланишини таъминлаш, шу жумладан, табиий ресурслар нархини туширишдан иборат бўлади”.

“Барча ўтган йиллар давомида хом-ашёни қазиб олиш ва сотишдан тушган даромадларни жамғармага йиғиб бордик. 2007-2009 йилларда таназзул билан курашга 10 млрд доллар сарфладик. Қолган пулларни еб юборганимиз ёки ишлатиб юборганимиз йўқ – аксинча, сақладик ва кўпайтирдик. Ҳозир эса ушбу ресурслардан бостириб келаётган таназзулдан ҳимояланган ҳолда халқ фарофонлиги йўлида фойдаланиш вақти келди. Улар мураккаб бўлган муддатдан ўтиш, бизнинг иқтисодиётимизнинг ўсишини рағбатлантиришда ёрдам беради”, – деб таъкидлади давлат раҳбари.

“Ушбу маблағлар қисқа муддатли чораларга мўлжалланмаган бўлиб, бизнинг иқтисодиётимизни янада тараққий топтиришга йўналтирилади. Айнан транспорт, энергетик, индустриал, ижтимоий инфраструктура, кичик ва ўрта бизнесни ривожлантиришга”, – деб қайд этди Н.Назарбоев.