Nestle Ўзбекистондаги энг оммабоп кофе турини ребрендинг қилди

Тошкент. 3 июл. ЎзТАГ – Nestle компанияси Ўзбекистонда Nescafe Classic номли кофесини ребрендингдан ўтказди. Янгиланган маҳсулот тақдимоти яқинда Тошкентда бўлиб ўтди, дея хабар беради Ўзбек телеграф агентлиги (ЎзТАГ) компания матбуот хизматига асосланган ҳолда.
“Нестле Узбекистан” компанияси бош директори Филипп Горбуновнинг сўзларига кўра, Nescafe Classic кофеси уч жиҳатдан жиддий янгиланди. Булар маҳсулот таъми, қадоғи дизайни ва уни илгари суриш стратегиясидир. Айни пайтда кофе нархи ўзгармайди.
Компания маълумотларига кўра, Ўзбекистонда кунига 300 минг чашка Nescafe Classic ичилади.
Эслатиб ўтамизки, “Нестле Узбекистан” ҚКси 2000 йил 10 февралда Наманган сут заводи асосида ташкил этилган. 2002 йилда эса Наманган шаҳрида газланган ва газланмаган Nestle Pure Life сувини қуйиш йўлга қўйилган.
2010 йилда компания Тошкентда ичимлик суви ишлаб чиқариш бўйича мамлакатдаги иккинчи фабрикасини очди.
Nestle компаниясининг маълумотларига кўра, Ўзбекистондаги қадоқланган сув бозорининг 30% ушбу ишлаб чиқарувчи улушига тўғри келади. Бундан ташқари, компания Ўзбекистондаги қадоқланган сут бозорининг 5% ҳам эгалик қилади. Компаниянинг кофе бозоридаги улуши ҳақида маълумотлар йўқ.