Ўнкегелли боулинг бўйича Ўзбекистон чемпионати 4 босқичи ғолиблари аниқланди
Тошкент. 14 март. ЎзТАГ – “Joy” боулинг-клубида Ўнкегелли боулинг бўйича жуфтликлар ўртасида Ўзбекистон чемпионати 4 босқичи бўлиб ўтди, деб хабар беради Ўзбек телеграф агентлиги (ЎзТАГ).
“Биринчи ўринни Файзулла Носиров ва Баҳодир Арифов дуэти эгаллади. Иккинчини Шаҳобиддин Юсупов ва Мансур Мирзаёқубовлар, учинчи ўринни эса Бахтиёр Далабоев ва Қудрат Хилямовлар эгалладилар”, - деб таъкидлашди Кегель спорти федерациясида.
Носиров ва Арифовларнинг ғалабаси ишқибозлар учун кутилмаган бўлмади. Бу жуфтлик ушбу турнирга жиддий тайёргарлик кўрган, техник-тактик жиҳатларга эътибор берган эди. Натижада узоқ танаффусдан сўнг йигитлар яна ғалаба қилдилар.
“Бугун биз қайрилувчи зарбаларни машқ қилдик ва бунга эриша олдик. Асосийси ҳам шу. Албатта, бунинг ўзи ғалаба учун озлик қилади, жамоавий руҳ ҳам зарур. Финалда эса бизга “страйк”лар серияси асқотди. Мавсумдаги биринчи олтинни ютиб олишдан мамнунмиз”, - деб таъкидлади Баҳодир Арифов.
