Ўнкегелли спорт боулинги бўйича Ўзбекистон XII Кубоги ғолиблари аниқланди
Тошкент. 25 август. ЎзТАГ – Тошкентда Ўнкегелли спорт боулинги бўйича Ўзбекистон XII Кубоги ғолиблари аниқланди, дея хабар қилади Ўзбек телеграф агентлиги (ЎзТАГ).
“Эркаклар ўртасида нуфузли совринни Бахтиёр Далабоев, аёллар орасида эса Татьяна Лефтер қўлга киритди. Қизиғи, Далабоев учинчи марта ушбу кубок соҳиби бўлиб, 2010 ва 2012 йиллардаги ютуғини такрорлади. Бунга қадар фақат етакчи боулингчилар Бекзод Тўхтаниёзов ва Сергей Саповларгина икки марта ушбу кубок эгаси бўлган эдилар”, – деб таъкидлашди мамлакат Кегел спорти федерациясида.
“Мавсум қизиқарли ва муваффақиятли бўлди. Уни ғалаба билан якунлаганимдан мамнунман. Кучли финалчилар орасида биринчи бўлиш кишига ҳузур бағишлайди. Бундай жаҳон талабларига жавоб берадиган шароитларда ўйнаш эса янада мароқли”, - деди Б.Далабоев.
Эслатиб ўтамизки, илгари ЎзТАГ агентлиги 21 - 23 августда тошкентдаги “The Bowler” клубида Ўнкегелли спорт боулинги бўйича Ўзбекистон XII Кубоги бўлиб ўтиши ҳақида хабар қилган эди.
