Нью-Йоркдаги ўзбек-америка бизнес-форумида $2,6 млрдлик келишувлар имзоланди
Тошкент. 21 сентябр. ЎзТАГ – 20 сентябрда Нью-Йоркда (АҚШ) бўлиб ўтган ўзбек-америка бизнес-форуми якунлари бўйича $2,6 млрдлик келишувлар имзоланди, деб хабар беради Ўзбек телеграф агентлиги (ЎзТАГ).
Давлат раҳбари матбуот хизмати маълумотига кўра, форум Ўзбекистон президенти Шавкат Мирзиёевнинг АҚШга ташриф доирасида бўлиб ўтди.
Тадбирда АҚШнинг 100 дан ортиқ етакчи компанияси раҳбарлари иштирок этди. “General Electric”, “Honeywell”, “ExxonMobil”, “CNH Industrial”, “John Deere”, “Coca-Cola”, “Boeing”, “Caterpillar”, “City Group”, “Visa”, “AGCO”, “Gilead Sciences” каби йирик корпорациялар шулар жумласидандир.
Жумладан, “General Electric” ва “Honeywell” корпорациялари билан нефть-газ ва нефть-кимё соҳаларида, “CNH Industrial”, “John Deere” ва “Caterpillar” компаниялари билан машинасозлик соҳасида, “OSI Systems” ва “Lutron” компаниялари билан электротехника соҳасида, “Boeing” компанияси билан фуқаро авиацияси соҳасида истиқболли қўшма лойиҳаларни амалга ошириш бўйича келишувлар имзоланди.
Шунингдек, Тошкент шаҳрида Вебстер университети филиалини очиш тўғрисида келишув имзоланди. Бу АҚШ олий ўқув юртининг МДҲ мамлакатларидаги биринчи тўлақонли филиали бўлади.
Америкалик иштирокчилар Ўзбекистонда валютани тартибга солиш тизимига бозор механизмларини жорий қилиш, банк-молия тизимини мустаҳкамлаш, бизнеснинг солиқ юкини қисқартириш, инвесторлар учун, жумладан, мамлакатимизда ташкил этилган янги эркин иқтисодий зоналар доирасида қўшимча имтиёз ва преференциялар бериш бўйича амалга оширилаётган кенг кўламли ислоҳотларни юксак баҳоладилар.
Бизнес-форум Ўзбекистон Республикаси Инвестициялар бўйича давлат қўмитаси томонидан Америка – Ўзбекистон савдо палатаси билан ҳамкорликда ташкил этилди.
