Орол денгизининг тубида индиго ўсимлигини етиштириш бошланди
Тошкент. 6 июн. ЎзТАГ - Орол денгизининг қуриб қолган тубида жинси ва бошқа пахта матолар учун табиий бўёқ олинадиган индиго ўсимлигини етиштириш бошланди, деб хабар беради Ўзбек телеграф агентлиги (ЎзТАГ).
Бу ҳақида ўтган шанба куни Тошкентдаги Инха Университетида бўлиб ўтган Green Business Platform семинарида биология фанлари доктори, профессор, БМТ ҳузуридаги Экологик хавфсизлик халқаро академиясининг академиги АбдуқодирЭргашев маълум қилди.
Унинг сўзларига кўра, кучли шўрланган ерларда битта ўсимлик – индигоферани (Indigo feratinctoria) ўстириш мумкин. Ундан эса бутун дунёда табиий бўёқ олинадиган ноёб хом-ашё ажратиб олинади. Ҳозирда ЮНЕСКО, ЦЕФ (Германия) ва Урганч давлат университетининг (УрГУ) кўшма лойиҳаси ҳаракатлари билан индигофера Оролбўйи шароитларида муваффақият билан ўстирилиши мумкинлиги аниқланди. Денгиз тубида яратилган участкада индигофера ҳосили ҳам олинди. Шунингдек, олимлар гуруҳи бўёқ олиш учун тажриба қурилмасини ҳам яратдилар.
Эндиликда эса лойиҳага маҳсулотни қайта ишлаб, уни экспортга чиқаришни ташкил қилувчи инвесторлар зарур. Олимнинг таъкидлашича, индиго бўёғини дунёда фақат бир неча компания ишлаб чиқаради ва у жаҳон бозорида юқори қадрланади.
Халқаро Оролни қутқариш жамғармаси маълумотларига кўра, 1960 йилда денгиз майдони 68,9 минг кв. кмга тенг бўлган бўлса, 2013 йилда эса у 9155 кв. кмга тушиб қолган. Яъни собиқ денгиз сатҳининг деярли 60 минг квадрат км шўрланган ерларга айланган.
