Осиё Кубоги 2015: Футбол бўйича Ўзбекистон термаси Мельбурнга етиб келди
Тошкент. 15 январ. ЎзТАГ – Футбол бўйича Ўзбекистон миллий термаси Брисбендан Мельбурнга учиб келди ва бу ерда Саудия Арабистонига қарши 2015 йилги Осиё Кубоги учинчи тури доирасида ўйинга тушади, дея хабар беради Ўзбек телеграф агентлиги (ЎзТАГ).
Ўзбекистон Футбол федерациясидан хабар қилишларича, жамоа “Интерконтиненталь” меҳмонхонасига жойлашган. Бугун маҳаллий вақт билан соат 19.00да (Тошкент вақти билан соат 13.00да) жамоа Мельбурндаги биринчи машғулотини ўтказади.
Ўзбекистон термасининг Саудия Арабистони билан ўйини 18 январда маҳаллий вақт билан соат 20.00да (Тошкент вақти билан соат 14.00да) бошланади.
Қизиғи, Саудия Арабистони КХДРга қарши кечаги учрашувини айнан Мельбурнда ўтказди ва шу сабабли Ўзбекистон билан учрашув олдидан бошқа шаҳарга боришига тўғри келмайди.
Эслатиб ўтамизки, Осиё қитъасининг 16-биринчилиги 9-31 январ кунлари Австралиянинг беш шаҳри - Сидней, Ньюкасл, Брисбен, Канберра ва Мельбурнда бўлиб ўтмоқда.
