Осиё ўйинлари: ўзбек гимнастикачилари иккита кумуш медалларни қўлга киритдилар
Тошкент. 25 сентябр. ЎзТАГ – Ўзбекистон термасининг XVII ёзги Осиё ўйинларидаги медаллари сони яна иккитага кўпайди, дея хабар беради Ўзбек телеграф агентлиги (ЎзТАГ).
“39-ёшли Оксана Чусовитина таяниб сакраш мусобақасида шоҳсупанинг иккинчи поғонасини эгаллади. Яна бир спорт гимнастикачимиз – Абдулла Азимов ҳам отда машқларда кумуш медални қўлга киритди. Терма жамоамиз ҳисобида жами учта кумуш ва еттита бронза медаллар бор”, – деб таъкидлашди Миллий олимпиа қўмитаси матбуот хизматида.
Эслатиб ўтамизки, 19 сентябрдан 4 октябрга қадар Жанубий Кореянинг Инчхон шаҳрида XVII ёзги Осиё ўйинлари бўлиб ўтмоқда. Унда Ўзбекистондан спортнинг 32 тури бўйича 296 спортчи иштирок этмоқда.