ОТБ Ўзбекистон ирригация ва автомобил йўллари тизимини модернизация қилишни режалаштирмоқда

Тошкент. 14 ноябрь. ЎзТАГ – Осиё тараққиёт банки (ОТБ) Ўзбекистон ирригация ва автомобил йўллари тизимини модернизация қилишни режалаштирмоқда, дея хабар беради Ўзбек телеграф агентлиги (ЎзТАГ).

Бу ҳақда Ўзбекистон президенти Шавкат Мирзиёевнинг 13 ноябрь куни Марказий Осиё минтақавий иқтисодий ҳамкорлик дастури (МОМИҲ) вазирлик конференциясида иштирок этиш учун мамлакатимизга ташриф буюрган банк президенти Такехико Накао бошчилигидаги ОТБ делегацияси билан учрашувида сўз юритилди.

"Учрашувда ўзаро ҳамкорлик истиқболлари муҳокама қилинди. Мамлакатимизда ирригация-дренаж ва автомобил йўллари инфратузилмасини модернизация қилиш, жумладан, бошқарув тизимини такомиллаштириш, давлат-хусусий шериклик (ДХШ) механизмларини жорий этиш, кадрлар тайёрлаш ва бошқа масалалар бўйича узоқ муддатли стратегик ва дастурий ҳужжатларни ишлаб чиқиш ва амалга оширишга эътибор қаратилди", - дейилади Ўзбекистон раҳбари матбуот хизмати хабарида.

Шунингдек, минтақавий лойиҳаларни илгари суриш, энг аввало, транспорт коридорларини ривожлантириш, энергетика инфратузилмасини модернизация қилиш, экологик муаммоларни ҳал этишнинг устувор йўналиши қайд этилади.

Эслатиб ўтамиз, бугунги кунда икки томонлама ҳамкорлик портфели иқтисодиётнинг барча устувор тармоқларини қамраб олган ҳолда қарийб $8 млрдлик 60 дан ортиқ амалга оширилган ва амалга оширилаётган лойиҳаларни ўз ичига олади. 2019-2023 йилларда $5 млрддан ортиқ маблағ билан ҳамкорликни кенгайтириш бўйича банкнинг янги стратегияси қабул қилинди.

Сурат манбаи: president.uz