“Овоз. Болалар” лойиҳасининг ғолибаси Сабина Мустаева Ургантга билагузуклари сирини айтиб берди

Тошкент. 22 апрел. ЎзТАГ – “Овоз. Болалар” лойиҳасининг ғолибаси Сабина Мустаева “Кечки Ургант” кўрсатуви эфирида билагузуклари сирини айтиб берди, дея хабар беради Ўзбек телеграф агентлиги (ЎзТАГ).

Бошловчи Иван Ургантнинг билагузуклар ҳақидаги саволига ёш хонанда булар шунчаки тақинчоқ эмаслиги, балки бувиси томонидан қилиб берилган ўзига хос туморлигини маълум қилди. Сабина улардан ҳеч ажралмайди ва билагузуклар унга омад келтиради.

Бундан ташқари, Сабина Москвадан “Овоз. Болалар” лойиҳасининг қўшимча босқичига қайтиш ҳақидаги қўнғироқ унинг учун кутилмаган бўлганлигини ҳам айтиб ўтди. “Мен ухламоқчи бўлиб турган эдим. Шу пайт онам ошхонадан чақириб қолди. Чопиб бордим. Лекин бунинг ҳақиқатлигига ишонмас эдим... Кейин онам билан Макс амакининг олдига (Сабинанинг шоудаги продюсери Максим Фадеев) бордик. Кейин ресторанда буни нишонладик…” – деб айтиб берди 14 ёшли хонанда.

Эслатиб ўтамизки, кеча Сабина россия телевидениесининг Биринчи каналидаги “Кечки Ургант” кўрсатуви меҳмони бўлди. 17 апрелда эса каналнинг тўғридан-тўғри эфирида “Овоз. Болалар” лойиҳасида ғолибликни қўлга киритган эди.