“Пахтакор” “Бунёдкор” яримҳимоячиси билан шартнома имзолади
Тошкент. 5 декабр. ЎзТАГ – Ўзбекистоннинг ўн карра чемпиони “Пахтакор” “Бунёдкор” яримҳимоячиси Алибобо Раҳматуллаев билан шартнома имзолади, дея хабар беради Ўзбек телеграф агентлиги (ЎзТАГ) пойтахт клуби расмий сайтига асосланган ҳолда.
“Биз ушбу истеъдодли ёш футболчини жуда қадрлаймиз. Аслида Алибобо билан 2012 йилда шартнома тузгандик. Ўшанда у “Бунёдкор” тарбияланувчиси саналгани сабабли жамоага қайтишга рухсат бериш ҳақида илтимос қилди. Биз унинг илтимосини қабул қилдик. Чунки ўйинчини унинг хоҳиши бўлмаган тақдирда ушлаб туришдан фойда йўқ. Менимча, Раҳматуллаев “Бунёдкор”да 2 йил вақтни бой берди. Футболчи сифатида ўсиш учун етарлича ўйин амалиётига эга бўлгани йўқ. Биз унинг ўйинларини кўпдан бери кузатиб келамиз. “Пахтакор” сафида бор иқтидорини намойиш этиши учун тўғри йўналиш беришга ҳаракат қиламиз ва келажакда футболимиз катта салоҳиятли ўйинчини олиши учун унга имконият берамиз”, - деб изоҳ берди бунга “Пахтакор” менеджери Самвел Бабаян.
“Пахтакор”га ўтиш мен учун янги ва катта синов. Ёшлигимдан отам мени ушбу жамоа ўйинларини кўриш учун стадионга олиб келарди. Айтишим мумкинки, болалигимдан ният қилган орзу амалга ошди. Бундан жуда хурсандман. 2012 йил юз берган ҳолатни яхши эслайман. Ўшанда ҳали ёшроқ эдим ва бир неча тезкор қарорлар қабул қилишимга тўғри келган. Ўтишим рўй бермаганда отам мендан хафа бўлганди. Энди унинг ҳам орзуси ушалди. “Пахтакор” менежерига менга ишонч билдиргани учун раҳмат айтаман. Келажакда яхши ўйинлар кўрсатиб, жамоа ғалабаларига ҳисса қўшишга ҳаракат қиламан”, - деб таъкидлади ўз навбатида А.Раҳматуллаев.
